Psalms 129

Yes Israela tighason Maaron to itatan koiazŋa

Mbouŋ to yes tau tizala Yerusalem pa suŋuuŋ

1“Saawe tau kukuag ve ilam, koiagŋa tighurghur pataŋani naol payau.”
Yam eval tiina to Israel, eŋaeŋa asov asaav tauvene:

2“Onoon kat. Saawe tau kukuag ve ilam na, koiagŋa tighurghur pataŋani naol payau.
Eemon titatan ghau mako.

3Yes tiloslos ghau le ndumeg itamboroos.
Tivaghamun ghau le ndumeg imin taan tau tigheli pa vazoghiiŋ aniiŋ na.”

4Eemon Yoova ŋgar tooni, ene iduduuŋ mon.
Tauta igham mulin ghau ila zeran sasaghati tawe nimazi, ve namin besooŋa sorok pazi muul mako.
5Tamtamon tisov tau tighurghur koi pa nugh Zion na,
Yoova pale ipamuul zi tila toman mayazi.

6Yes pale timin kikiliiŋ tau itum izala ruum paavo.
Itum izaa tiina soone, ve igorgor.
Kikiliiŋ tauvene, tamtamon irau tilupu ve tipoosa imin tighamgham pa aniiŋ wit ne mako. Tipuli gha izi ileple.

8Isaav ighe tamtamon tilaagh tila le tizaa to Zion koiŋa izi eeze,
ene irau to tipalot zi pa Yoova eeza mako.
Irau tisaav pazi tighe: “Ila Yoova eeza, yei nisaav payam: Poia tooni aat izaa tsiam.” Vene mako.